Zhgënjen kampionia e Europës/ Evangjeli Veli rezulton pozitive për doping në kampionatin Europian
Një ëndërr që shuhet shpejt me sa duket ajo e Evangjeli Velit, peshëngritëses shqiptare që u shpall kampione Europë më 29 maj në Kampionatin Europian të zhvilluar në Tiranë nga ku mori 2 medalje të arta dhe një të argjendtë.
Pak ditë më parë ajo ka marrë rezultatin e analizave të dopingut nga ku ka rezultuar pozitive me doping, duke lëkundur ndjeshëm pozitat dhe karrierën e saj.
Testi i saj A ka patur gjurmë stanazololi sipas Qendrës Ndërkombëtare të Testimeve. Top Channel ka mundur të sigurojë raportin e laboratorit të Drezdenit në Gjermani i Licencuar edhe nga WADA, Agjencia Ndërkombëtare e Antidopingut.
Në të tregohet qartë se në këtë test të parë janë gjetur gjurmë elementësh të konsideruar doping si Stanazololi, një ndër elementët më të fuqishëm të dopingut që kanë prekur e kanë përdorur shumë sportist edhe në të shkuarën.
Burime për Top Channel konfirmojnë se ndaj sportistet Veli janë marrë masa pezullimi të përkohshme ndërkombëtare por edhe nga federata shqiptare e peshëngritjes, deri në pritje të Testit B që tashmë është kryer nga sportistja pasi ka patur afat deri më 3 gusht.
Nëse edhe testimi B do të nxjerrë të njëjtën përgjigje, atëherë gjithçka do të jetë përfundimtare dhe Evangjeli Veli si përsëritëse, rrezikon deri në 8 vite pezullim, pasi edhe në vitin 2018 ka rezultuar pozitive ndaj dopingut sërish, me steroid anabolik.
Rezultati i testit B del në muajin shtator dhe deri atëherë burime pranë sportistet bëjnë me dije se do të ndërmarrë edhe hapa ligjorë kundër Qendrës Ndërkombëtare të testimeve Antidoping për t’u mbrojtur.
Evangjeli Veli me 3 medaljet e fituara 2 ari dhe një argjendi do të përfitonte 72 milion lekë të vjetra nga shteti shqiptarë të cilat për momentin janë ngrirë dhe në rast se edhe testi B rezulton i njëjtë jo vetëm që nuk do t’i marrë por edhe do t’i duhet të dorëzojë 3 medaljet e marra, duke rrezikuar edhe mbylljen e karrierës pasi pezullimi për të është 8 vite dhe aktualisht Evangjeli Veli është në moshë 30-vjeçare.
Top Channel
