“Qëndroni pranë personave që e vlerësojnë lirinë tuaj dhe ju vlerësojnë për atë që jeni”
“E pashë veten në pasqyrë dhe thashë: “Po sa i bukur barku që kam vendosur. Është kaq i bukur trupi i një femre”. Bëra një foto dhe e publikova në rrjetet sociale, por ç’të shihja. Komente negative nga çdo anë. Është e trishtë që pjesa më e madhe e komenteve negative, vijnë nga femrat. Shumica madje pyesnin: “Burri yt është ai që të lejon të postosh foto të tilla?”. Sikur burri im të ishte ai që do të vendoste për trupin tim dhe për linjat e mia.
Është e trishtë, sidomos kur kjo gjë vjen nga femrat, të mendohet se duhet të jetë bashkëshorti ai që të vendosë për gjërat që gruaja e tij duhet të postojë në rrjetet sociale. Vajza, jemi në vitin 2022 dhe jemi ne ato që zgjedhim se me kë duam të qëndrojmë. Qëndroni pranë personave që e vlerësojnë lirinë tuaj dhe ju vlerësojnë për atë që jeni”. – Chiara Ferragni
Ky është një nga problemet më të shpeshta, sidomos në shoqërinë tonë. Ende ekziston ai koncepti konservativ që në një lidhje, apo në fejesë (sigurisht dhe në martesë), të shkëmbehen adresat e rrjeteve sociale, a thua se tradhëtia ndodh vetëm përmes rrjeteve sociale. Mbi të gjitha, ende ekziston koncepti që të jetë bashkëshorti ai që të vendosë se çfarë duhet të shpërndajë gruaja e tij në facebook, apo instagram. Këto janë mendime jashtëzakonisht të gabuara, pasi kohët kanë ndryshuar dhe secili nga të dy personat e një çifti, ka të drejtë të postojë çfarë të dojë. Nuk jemi në kohën e diktaturës, kur shoqëria ishte patriarkale dhe i zoti i shtëpisë kontrollonte gjithçka. Fatmirësisht, jemi në një kohë lirie si për femrat, dhe për meshkujt, ndaj secili ka të drejtë të bëjë çfarë të dojë, sigurisht pa e lënduar personin tjetër në çift.
Bota.al
