10 fakte interesante rreth Helsinkit, kryeqytetin më të ftohtë nordik
NgaAmerican Eye
-
Kryeqyteti i Finlandës, Helsinki, ka një histori vërtet magjepsëse me ndikime të mëdha nga Suedia, vendet baltike dhe Perandoria Ruse.
I njohur kohët e fundit si vendi më i lumtur në botë, Finlanda ka qenë një shtet i pavarur që nga viti 1917. Kryeqytetit të saj, Helsinkit, i është dashur të rritet me hapa të shpejtë për t’u bërë një kryeqytet i pavarur në arenën globale.
Në disa pjesë, ai të kujton kryeqytetin e Suedisë, Stokholmin. Në disa pjesë të tjera, ju mund të shihni ndikime nga vende të ndryshme. Por, ka dhe shumë gjëra që janë tipike të Finlandës në këtë qytet magjepsës.
* Helsinki është kryeqyteti më i ftohtë në rajonin nordik
Nga pesë kryeqytetet kryesore nordike, Helsinki ka temperaturën mesatare më të ftohtë në periudhën e dimrit.
Rekordi i temperaturave më të ulëta në Helsinki arriti deri në -34.3 °C, megjithëse temperaturat sot ka të ngjarë të jenë shumë më të buta. Megjithatë, temperaturat mesatare nën zero vazhdojnë të konsiderohen normale gjatë dimrit.
* Saunat ndodhen kudo
Nëse dëshironi të provoni maninë kombëtare të Finlandës për të vizituar një sauna, atëherë nuk do t’ju duhet të kërkoni shumë në Helsinki. Saunat janë instaluar në hotele, në qendrat e argëtimit, madje edhe në ndërtesa zyrash.
Për më tepër, në arenën Hartwall të qytetit, njerëzit mund të bëjnë sauna ndërkohë që shikojnë një ndeshje hokej mbi akull.
* Helsinki është një kryeqytet nordik i dizajnit
Dizajni nordik ka intriguar njerëzit në të gjithë botën, që kur ai u bë trend në vitet 1950. Mobiliet dhe xhami janë dy elemente kryesore të këtij dizajni dhe nuk ka vend më të mirë për të zbuluar këto karakteristika sesa në Helsinki.
Shumë nga emrat më të mëdhenj të dizajnit nordik, të tillë si Alvar dhe Aino Aalto, Harri Koskinen dhe marka Marimekko e themeluar nga Armi Ratia, i kanë rrënjët e tyre në Helsinki. Qyteti ishte në qendër të vëmendjes të së gjithë botës në vitin 2012, pasi u cilësua si Kryeqyteti Botëror i Dizajnit.
Arkitektët modernë vazhdojnë ta ruajnë këtë trend. Design District në Helsinki është një destinacion që duhet parë për këdo që është i interesuar të zbulojë tendencat më të fundit.
* Helsinki është afërsisht po aq i madh sa Oslo
Për disa arsye, është krijuar ideja se Helsinki është më i madh se Oslo. Por në fakt, të dyja qytetet kanë një madhësi shumë të ngjashme.
Helsinki ka një popullsi prej 658,864 banorësh, e cila shkon në 1,268,296 nëse përfshihen edhe rrethinat urbane, ndërsa popullsia e Oslos është 702,543 banorë, por bashkë me rrethinat urbane shkon në 1,036,059.
* Helsinki ka një marrëdhënie të fortë me Talinin e Estonisë
Kryeqyteti i Estonisë, Talini, ndodhet direkt përtej Gjirit të Finlandës, përballë Helsinkit. Më shumë se dhjetë tragete në ditë nga operatorë të shumtë kalojnë këtë zonë të ngarkuar të trafikut detar, duke ofruar një lidhje të vlefshme për biznesin dhe turizmin.
* Qyteti u krijua nga një mbret suedez
Në vitin 1550, Mbreti Gustav I i Suedisë themeloi qytetin tregtar Helsingfors, i cili vazhdon të mbetet edhe sot e kësaj dite emri i qytetit të Helsinkit në suedisht. Ai synonte që ky qytet të ishte një rival i qytetit Hanseatik, i cili tani është Talini.
* Aty ndodhet një kishë brenda një shkëmbi
Kisha Temppeliaukio është një kishë luterane në lagjen Töölö të qytetit. Ka shumë kisha në Helsinki, por kjo ka një arsye më shumë për t’u vizituar.
E projektuar nga vëllezërit arkitektë Timo dhe Tuomo Suomalainen, kisha është ndërtuar brenda një shkëmbi të fortë. Vëllezërit zbuluan se mund të përmbushnin nevojat akustike duke i lënë të ekspozuara muret e shkëmbinjve nga brenda.
Pavarësisht se në fillim ishte një ide shumë radikale, kisha tashmë është kthyer në një atraksion të madh turistik për qytetin që nga hapja e saj në vitin 1969.
* Biblioteka ka një arkitekturë mbresëlënëse
Biblioteka Kombëtare e Finlandës shërben si një kryeqendër e jetës letrare dhe kulturore në Finlandë.
Me përgjegjësinë për të ruajtur të gjitha materialet e shtypura dhe ato audiovizuale të prodhuara në Finlandë, biblioteka është një tempull i vërtetë librash. Gjithashtu, ajo ka koleksionin më të madh dhe gjithëpërfshirës në të gjithë botën, i cili i referohet Perandorisë Ruse.
Por, shumica e njerëzve e vizitojnë atë për të shijuar arkitekturën mbresëlënëse, me tavane të larta, shkallë të stilit klasik dhe nota të artit modern.
* Kalaja detare e qytetit është një vend i Trashëgimisë Botërore
E ndërtuar në fund të shekullit XVIII mbi gjashtë ishuj në hyrje të portit të Helsinkit, kalaja Suomenlinna është një “shembull veçanërisht interesant i arkitekturës ushtarake europiane të asaj kohe”.
Ky është vendimi që mori UNESCO në vitin 1991, duke e shtuar kështjellën në listën e vendeve të Trashëgimisë Botërore. Ndër veçoritë e saj është se kalaja përbëhet nga 200 ndërtesa dhe plot 6 km mure mbrojtëse.
E ndërtuar nga flota suedeze, kalaja ka shërbyer për të mbrojtur Suedinë, Perandorinë Ruse dhe Finlandën gjatë viteve. Në suedisht, kalaja njihet me emrin Sveaborg.
* Helsinki është aeroporti kryesor i Finnair
Aeroporti Helsinki-Vantaa është kryesori për Finnair, linja ajrore kombëtare e Finlandës e cila dominon aviacionin vendas dhe atë ndërkombëtar që lidhet me Finlandën. Si pjesë e Oneworld, Finnair operon në më shumë se 100 destinacione në mbarë botën.
Tradicionalisht, Finnair njihet si një lidhje e rëndësishme midis Europës Veriore dhe Azisë, veçanërisht Kinës. Megjithatë, pjesa më e madhe e këtij trafiku ajror aktualisht është pezulluar.
